CEBU, Philippines - Mipahimangno ang Department of Health sa publiko nga mag-amping bahin sa mga sakit nga makuha panahon sa ting-init.
Matud ni Ligaya Moneva, Health Education and Promotions Officer-3 sa DOH-7 nga likayan g’yud ang magpabulad og maayo sa init gumikan kay mao kini ang hinungdan sa dehydration, heat stroke, skin cancer ug uban matang sa sakit. Gikan lamang sa alas-7 hangtud sa alas-9 sa buntag ang oras nga mahimong mabuwad sa init ang usa ka tawo.
Kinahanglan usab nga moinom kanunay og fluids sama sa tubig aron mailisan ang singot nga ipagawas sa lawas.
Angayan usab bantayan kadtong mga edaran ug mga babayeng anaa sa menopausal stage tungod kay sila maoy dali masakit tungod sa kainit sa panahon.
Gidasig sa DOH-7 ang pagkaon og prutas ug utan ilabi na sa kabataan ug labaw sa tanan, ang balanse nga pagkaon ug kalimpyo sa panglawas. Kun dili kalikayan nga mogawas bisan udtong tutok, kinahanglang magdala na lang g’yud og payong o bisan unsang proteksyon sa init sa adlaw. (BANAT NEWS)