CEBU, Philippines - Sugdan na ang pagtukod sa bag-ong merkado publiko sa Barangay Centro sa dakbayan sa Mandaue karong bulan sa Mayo.
Si Mosuline Suliva, market administrator sa dakbayan nga nahinabi sa Banat News miingon nga sugdan ang pagguba sa karaan nga building karon nga nakabalhin na ang Police Station 1 ngadto sa Senior Citizen Building sa Sitio Tribunal sa mao gihapong barangay.
Matud pa ni Suliva natapos na ang desinyo sa plano sa pagatukoron nga merkado nga gastuhan og P300 milyones ngadto sa P400 milyones nga kantidad.
Naglakip ugmaron sa lugar ang maayong drainage system ug palapdan ang dalan nga mao kaniadto nga problema nga nasinati sa karaang merkado. Gibalhin ang maong merkado tungod sa pagkasunog niini ug nagtukod og laing merkado sa luyo sa Mandaue City Sports and Cultural Complex apan gilangaw lang kini tungod sa gilay-on.
Nasamotan pa g’yud kini dihang miigo ang 7.2 magnitude nga linog niadtong 2013 ug gideklarar nga peligrong gamiton, sa pagkakaron gibutang sa hawan nga bahin sa maong merkado ang mga vendors. (BANAT NEWS)