CEBU, Philippines – Grabe’ng naangol ang usa ka tawo nga biktima sa pagpanunggab sa gikainom niya’ng silingan sa Zone Luy-a, Paknaan, dakbayan sa Mandaue alas 10 pasado sa niaging gabii.
Ang biktima mao si Darrel Amamangpang, hingkod ug ang suspek giila nga si Randy Bandilao kinsa dali nga nakasibat. Si Senior Police Officer 1 Gregorio Cabizares sa Presinto 3 sa Mandaue City Police Office (MCPO) niingon nga ang igsuon sa suspek nga si Reynante, 19, maoy nadakpan sa mga barangay tanod tungod sa paghuboghubog.
Mohimo usab sila og imbestigasyon kun may kalabutan ba sa pagpanunggab.
Nasayran nga nagkabangi na ang duha atol sa piyesta sa ilang dapit ug nasubli sa niaging adlaw nga nisangko sa pagpanunggab.
Ang biktima nga nakabaton og samad dinunggaban sa bukobuko ang gidala sa tambalanan. – /GMR) (BANAT NEWS)