CEBU, Philippines — Nasikop sa mga sakop sa City Intelligence Branch ang upat ka tawo lakip na sa usa ka babaye nga gituohang drug pusher sa buy-bust operation diha sa Purok 8 sa Barangay Kamputhaw sa dakbayan sa Sugbo sa miaging gabii.
Ang nasikop naila nga sila si Editha “Edang” Gabato, 48, taga Kamputhaw; ug iyang igsuon nga si Aladia Gabato, 41, taga Marigondon, Lapu-Lapu City; Jonas Compra, 28, taga Alaska, Mambaling; ug si Rudy Rabong, 26, taga Kamputhaw.
Usa ka police poseur buyer ang nakapalit kang Editha og usa ka pakete nga shabu hinungdan sa pagkasikop kaniya. Apan sa pagsud sa iyang balay, naabtan ang tulo ka tawo ug giapil sila sa pagdakop.
Nakuha gikan kang Editha ang 31 ka gamay nga pakete sa shabu lakip na ang subject sa buy-bust nga mobalor og P8,600 ug ang buy-bust money nga P200.
Si Compra nakuhaan og usa ka medium sized nga pakete sa shabu nga mobalor og P12,500, samtang si Aladia ug si Rabong nakuhaan og drug paraphernalia.
Si Inspector Gomersendo Mandawe, deputy chief sa CIB, nga nahinabi sa Banat News miingon nga ang suspek taud-taod na nila nga gipa-ubos sa surveillance.
Samtang nadakpan ang gibansagang idlas nga pusher sa dalan Magallanes, Barangay Baring, Lungsod sa Carmen.
Si Inspector Ricardo Echavez maoy nangulo sa buy-bust operation nga miresulta sa pagkasikop ni Leonedez dela Peña Lumapas, 33.
Gawas sa usa ka paketeng shabu nga napalit sa mga polis nakuhaan pa kini og dugang pito ka paketeng shabu. (BANAT NEWS)