CEBU, Philippines - Dugang kaso ang atubangon sa usa ka Nigerian national nga nagbinastos sa usa ka police official tungod sa pagpamakak niini sa tinuod niyang pangalan. Ang hepe sa Mabolo Police Station nga si Senior Inspector Peter Hartzel Bellido nga nahinabi sa Banat News miingon nga ang langyaw nagpaila nga siya si Ghukmele Ezeal, apan kini diay mao si Eze Lloyd Chukwuemelie, base kini sa rekord sa Bureau of Immigration.
Si Bellido miingon nga klaro kaayo nga gituyo sa maong langyaw ang paglimod sa iyang pangalan hinungdan nga kini ila’ng gipasakaan og kaso nga “concealing of true name.”
Ang maong langyaw gidakop sa usa ka police official inabagan sa mga guwardiya sa usa ka mall human niini ginudnod ang nawong sa maong polis sa iyang kinatawo diha sa kasilyas sa parking area sa maong mall. Ang BI daan nang mipahibalo nga ilang ipa-deport ang maong langyaw tungod sa pagka “undesirable alien” niini kun mahuman na og husay ang iyang kaso. (BANAT NEWS)