CEBU, Philippines - Usa ka 17-anyos nga Yolanda survivor sa Leyte ang gikostudiya sa kapolisan human gitumbok sa magsuong mga bata nga iyang gilugos ug gipangmolestiya diha sa usa sa mga barangay sa dakbayan sa Lapu-Lapu.
Si Police Officer 1 Lucelyn Estrelloso , ang responding officer sa Pusok Police Station 5, miingon nga ang apohang babaye, iyaan ug inahan sa mga biktima midangop kanila ug misumbong sa gibuhat sa suspek ngadto sa mga bata.
Matud pa nga alas 6 sa Miyerkules sa gabii dihang misumbong ang 7-anyos nga biktima nga gilugos kini sa suspek.
Sa pagsukitsukit sa mga manghod sa biktima nga nag-edad og 6, ug 3-anyos mitug-an usab sila nga gimolestiya sila sa ilang “kuya” sud na sa duha ka tuig. Kataposang giabuso ang 7-anyos sa miaging Martes sa gabii diin gilugos g’yud sa suspek ang biktima.
Ang suspek taga Tacloban City ug gisagop sa inahan sa mga biktima niadtong tuig 2013 tungod kay naluoy kini sa bata kay gibanlas sa bagyong Yolanda ang maong lugar.
Si Police Senior Inspector Judith Besas, hepe sa Women and Children’s Protection Desk sa Lapu-Lapu City Police Office nagkanayon nga ang mga bata mitug-an nga mahitabo ang pagpangabuso kun padulong mangatulog ang mga bata sa hapon, ang suspek maoy tigbantay sa mga bata nianang orasa.
Nasayran nga magtabang-tabang sa pagpaninda og mga utanon ang suspek sa merkado sulod sa Barangay Poblacion.
Ang inahan sa mga biktima panagsa lang makauli kay nagtungha kini sa Cebu City mao nga ang iyang inahan ug ang suspek lang magbantay sa mga bata.
Ang suspek graduating na sa high school sa usa ka public school sa Barangay Pajo.
Ang suspek gisikop diha sa merkado samtang nagbantay kini sa ilahang tindahan apan mihimakak kini sa pasangil ug miingon nga wala siya nakahibalo sa iyang gibuhat. (BANAT NEWS)