CEBU, Philippines - Duha ka oras nga nakignegosasyon ang kapolisan sa Talisay sa usa ka lalaki nga gihimong “bump car” ang usa ka kinarnap niini nga taxi ug gidala sa sulod sa usa ka pribado nga tunghaan sa Barangay Bulacao sa dakbayan sa Talisay sa miaging buntag.
Ang nasikop naila nga si Jedy Basa nga gipangdaro kutob sa iyang makit-an sa sulod sa East Visayan Academy.
Tungod sa kasamok nga namugna sa maong lalaki gisuspenso ang klase sa mga bata.Si Police Officer 3 Shindey Tabokos, desk officer sa Talisay City Police Station miingon nga nagmagahi ang suspek pagtahan hinungdan nga ilang gibuslotan ang ligid ug gimaymayan kini sud sa duha ka oras.
Dihang napakalma sa kapolisan ang suspek , mitug-an kini nga dunay mga tawo nga buot mopatay kaniya.
Ang Cebu Integrated Transport Services Cooperative (CITRASCO) mibutyag nga gi-carnap atubangan sa usa ka hotel ang maong taksi ug kini gi-report nila sa Mabolo Police Station, ang kompanya mokiha sa suspek. (BANAT NEWS)