CEBU, Philippines – Nanawagan ang mga sakop sa Alliance of Concerned Teachers-Region 7 Union sa suporta sa mga Sugbuano’ng kongresista alang sa usbaw sa suhulan.
Kapin sa 100 ka sakop sa unyon kagahapon ang nagpahigayun sa “Walk for Salary Hike” gikan sa Abellana National High School padulong sa Fuente Osmeña Circle.
Ang House Bill No. 245 nagtumong sa pagpa-usbaw sa minimum nga binuwan nga sweldo sa mga magtutudlo ug non-teaching personnel sa publikong eskwelahan sa elementarya ug sekondarya.
Si Bernabe Simbajon, bise presidente sa teacher’s union, nipasangil kang Presidente Benigno Aquino III nga wala mohatag og pagtagad sa kalisud nga nasinati sa mga magtutudlo sa mga publiko’ng eskwelahan.
"Wa siya’y pagpakabana sa mga magtutudlo labi na sa economic aspect namo. Nagpadayon siya nga nagpaka buta-bungol. Wa siya magtagad sa among kahimtang," matud ni Simbajon.
Si Antonia Lim, presidente sa union, ug Bernabe nanawagan sa pagluwat ni Aquino sa katungdanan.
Matud ni Simbajon nga katapusang nakadawat sila og umento sa sweldo niadto pa’ng tuig 2009 panahon ni kanhi Presidente Gloria Macapagal-Arroyo kinsa niaprobar sa P6,000 nga usbaw sa ilang suhulan matag buwan.
Ang ACT nanawagan sa P6,451 nga usbaw sa suhulan sa mga magtutudlo ug non-teaching personnel matag buwan base sa HB 245 sa ACT Teachers Partylist Rep. Antonio Tinio. (Brenda D. Batuto gikan sa The Freeman/GMR) (BANAT NEWS)