CEBU, Philippines – Nadakpan sa kapolisan ang suspek sa pagpanulis og taxi sa sitio Calan, Poblacion, lungsod sa Cordova ala una pasado ang takna kagahapon sa buntag.
Si Senior Police Officer 1 Laurencio Wagwag sa Cordova Police Station niila sa nadakpan nga si Mico Maro, 23-anyos, taga Caimitohan, Canjulao, dakbayan sa Lapu-Lapu.
Ang suspek giila sa biktima nga si Rolando Espina, 51-anyos, drayber sa KEN Taxi nga taga La Paloma Subdivision, Labangon, dakbayan sa Sugbo.
Asoy sa biktima nga nisakay sa gimaneho niya’ng taxi ang suspek gikan sa Umapad, dakbayan sa Mandaue ug nagpahatud sa Poblacion, Cordova.
Paghidangat na sa maong dapit, kalit lang namugnaw ang tangkugo sa biktima diha’ng giti-onan og icepick ug nideklarar nga tulis.
Gikuha sa suspek ang P2,600 ug cellphone sa biktima ug nagdali pagkanaug ug naglakaw lang pahilayo sa maong dapit.
Ang biktima nipabulhot sa pagpadagan sa taxi ngadto sa buhatan sa kapolisan hinungdan nga gitubag ang alarma.
Gisuhid sa kapolisan ang kadalanan sa barangay Poblacion hangtud nasigpatan ang suspek nga naglakaw kay wala na’y traysikol nga masakyan.
Giila sa biktima ang suspek nga mao’y nagtulis kaniya ug diha’ng girekisa, nakuha ang kuwarta, cellphone ug kutsilyo nga gisulod sa bulsa hinungdan nga gidakop ug gibalhug sa bilanggoan. – /GMR) (BANAT NEWS)