CEBU, Philippines – Human sa nahitabo’ng blackout sa niagi’ng semana, si Gob. Hilario Davide III nipatawag sa mga opisyal sa National Grid Corporation of the Philippines (NGCP) ug Department of Energy (DOE).
Gibutyag ni DOE-Visayas Director Antonio Labios nga nibuto ang sub-station sa NGCP sa dakbayan sa Naga hinungdan sa blackout.
Matud niya nga ang NGCP nagpadayun pa sa ilang imbestigasyon aron masuta ang hinungdan ug malikayan nga masubli ang sama’ng insidente.
Gibutyag ni Labios nga 40 ngadto sa 80 megawatts lang ang reserve sa kuryente karong semanaha.
Gipasabot ni Labios nga ang maong sistema gitawag og “yellow alert” nga buot ipasabot nga adunay reserve nga kuryente apan kuwang.
Matud niya nga dunay mga planta nga wala mag-operate sama sa 82 megawatts sa Cebu Energy Development Corporation (CEDC) sa dakbayan sa Toledo, 82 megawatts sa Panay Energy Development Corporation ug ang usa ka unit sa Korean Electric Power Corporation (KEPCO) nga 100 megawatts nga gi-ayo pa.
Subay niini si Abner Bardoquillo sa NGCP nagkanayun nga karo’ng summer dunay igo’ng supply sa kuryente.
Matud niya nga kung dunay reserve nga kuryente wala’y mahitabo’ng brownout apan kung kuwang ang reserved dunay posibilidad sa brownout dili lang sa Sugbo kung dili apil sa sikbit nga lugar. – /GMR) (BANAT NEWS)