CEBU, Philippines – Gipahigayun na ang groundbreaking ceremony sa Balik Balay Project sa mga biktima sa bagyo'ng Yolanda sa barangay Esperanza, Pilar, isla sa Camotes.
Nangulo sa kalihukan sila si Bise Gob. Agnes Magpale ug Balik Cebu Committee nga gipangulohan ni Tetta Baad.
Ang pundo nga gipalit sa lote gikan sa buhatan sa bise-gobernador.
Nikabat sa 73 ka balay ang giila nga kinahanglan nga ibalhin ngadto sa Balik Balay Community gikan sa danger zones.
Si Magpale nihangyo kang Baad nga mohatag og tabang sa barangay Esperanza pinaagi sa Balik Cebu Committee sa Cebu City Tourism Commission.
Si Provincial Tourism Officer Grace Paulino nipasabot nga ang Pilar usa sa mga potential nga lugar alang sa industriya sa turismo tungod sa limpyo ug tin-aw nga kadagatan ug puti nga kabaybayonan.
Ang Pilar usa sa mga lugar nga nagusbat human sa pagkuso-kuso sa Bagyong Yolanda niadtong 2013.
Ang Balik Cebu Committee nag-awhag sa mga balikbayan nga mouli matag tuig sa nasud sa pagtambong sa kasaulogan sa Sinulog nga mohatag og donasyon alang sa maong proyekto.
Ang bag-ong gikoronahan nga Ms. Cebu 2015 Wynonah Buot kinsa nirepresentar sa Miss Cebu Charities nga usa sa mga donors ang nitambong sa kalihukan.
Ang maong fundraising nangolekta og mga cash nga donasyon alang sa katukuran sa mga balay sa mga nabiktima ni Yolanda. – /GMR) (BANAT NEWS)