CEBU, Philippines – Nasikop sa mga sakop sa City Intelligence Branch ang usa ka lolo human nga nakuhaan kini og lima ka armas sa mga polis diha sa iyang balay sa Sitio Cantipla I, Barangay Taptap sa dakbayan sa Sugbo.
Ang nasikop naila nga si Apoloniano Buntoyan, 61, nga molupyo sa maong lugar.
Nasikop si Buntoyan pinasikad sa usa ka search warrant nga giisyu ni Regional Trial Court Branch 18 Judge Gilbert Moises sa Cebu City. Sumala pa ni Inspector Gomersendo Mandawe, deputy chief sa CIB, mitungas sa maong barangay ang mga sakop sa CIB aron sa pag-serve sa maong search warrant.
Sa pag-abot sa mga polis sa balay sa suspek giingong giyawyawan sila niini apan ilang gipasabot bahin sa search warrant.
Sa ilang pagsuhid sa balay nakuha nila ang upat ka revolver ug usa ka .45 kalibre nga pistola nga pulos wala’y mga lisesnya.
Matud pa ni Mandawe nga silingan ra sa suspek ang mitaho sa kapolisan tungod kay nagpunay kini og tak-in sa iyang armas.
Matud pa ni Mandawe nga ilang gihimoan og surveillance operation ang suspek ug ila ‘sab nasuta gikan sa Firearms Explosives Security Service Agency and Guards Supervisory Section (FESSAGS) nga wala kini lisensya. – /EIM) (BANAT NEWS)