CEBU, Philippines – Mga departamento ug opisyal sa Cebu City Hall gipasidunggan tungod sa maayo nilang labok sa ilang mga trabaho.
Gigantihan ang Cebu City Legal Office isip Outstanding Department sa dakbayan atol sa selebrasyon sa ika-78 Charter Day anniversary sa siyudad niadtong Sabado.
Matud ni Atty. Jerone Castillo, pangulo sa City Legal Office nga dili niya makab-ot ang maong ganti kun siya rang usa. Nagpasalamat si Castillo sa 16 ka mga batan-on ug dedikadong mga legal team sa siyudad.
Sukad milingkod si Castillo isip pangulo sa maong opisina niadtong 2013, wala pa napildi sukad ang siyudad sa mga kasong giatubang niini. Ang kaso batok sa mga manununod ni Rev. Fr. Vicente Rallos ang labing dakong kaso nga giatubang sa dakbayan.
Nakadawat ang maong grupo og P50, 000 cash ug plaque of recognition.
Samtang gipasidunggan usab si City Agriculturist Joey Baclayon isip outstanding department head. Si Baclayon nagtukod og asosasyon sa tanang mag-uuma sa bukirang bahin sa dakbayan hinungdan sa paglambo sa ilang panginabuhi. – (BANAT NEWS)