CEBU, Philippines - Mga sakop sa PNP Regional Public Safety Battalion-7 nakig-alayon sa The Freeman ug Banat News aron sa pagpahigayon og Basic News Writing ug Feature Writing Seminar didto sa Barangay Bahay, lungsod sa Sibonga sa miaging adlaw.
Dul-an sa 30 ka sakop sa RPSB-7 ang mitambong sa maong kalihokan nga gihimo sa Camp Ceferino Genovia. Si PO1 Edwin Catamco, tigpamaba sa RPSB-7, miingon nga gusto nila nga mabaid ang mga polis sa pagsuwat og balita ug mga feature stories kay magmugna sila og official publication nga “Kidlat.”
Ang mga mitambong sa seminar, nga naglakip sa unom ka opisyal, mao ra pud ang mga mosulat sa maong publication aron mapaabot nila sa katawhan ang ilang mga kalampusan sulod sa usa ka tuig.
Matud ni Catamco ang Kidlat mogawas makaduha sa usa ka tuig ug kay dili man hanas nga mosuwat og balita ang mga polis mao nga mihangyo sila sa The Freeman ug Banat News aron sila matabangan.
Gitudloan ang mga polis og “lecture” sa Basic News Writing ug gisundan sa workshop diin gibahin ang mga partisipante sa lima ka grupo ug gipasuwat g’yud sila og balita.
Human nga nakasuwat na og balita ang mga polis, dunay usa ka representante sa grupo nga mibasa niini ug mi-explain sa ilang gisuwat nga balita.
Gisunod ‘sab dayon ang Feature Writing diin nakita ang tinagoang mga talento sa mga polis sa pagsuwat.
Gipasuway g’yud sa pagpasuwat ang mga polis ug sama sa una nilang gibuhat usa ka representante ang mi-report sa atubangan ug mibasa sa ilang sinuwat nga nagpakita sa ilang mga tinagoang talento. (BANAT NEWS)