CEBU, Philippines - Ang kadagkoan sa probinsya sa Sugbo miawhag sa mga opisyal sa kalungsoran nga mohimo sila og hugtanay nga kampanya batok sa ilegal nga drugas sa tagsa-tagsa nila ka lugar.
Si Board Member Carmen Remedios Meca, pangulo sa committee on anti-illegal drugs sa Cebu Provincial Board miduso og resolusyon nga nagpahinumdom sa opisyal sa ilang tahas pagsumpo sa drugas.
Adunay pipila ka mayor sa kalungsoran sa Sugbo nga wala motuman sa kamandoan sa Department of Interior and Local Government (DILG) ug ni Gobernador Hilario Davide III.
Si Davide ug ang Cebu Provincial Anti-Drug Abuse Commission (CPADAC) miisyu og memorandum ngadto sa tanang mayor sa kalungsuran ug siyudad sa probinsiya nga ilakip sa ilang budget sa tuig 2015 ang mga programa batok sa ginadili’ng drugas.
Ang balaod nga gilatid sa Article VII sa Republic Act 9165 kon Comprehensive Dangerous Drugs Act nagkanayon nga ang tanang LGU kinahanglang mogahin og kantidad sa ilang annual budget alang sa pagsumpo sa ilegal nga drugas, paghimo’g preventive ug education programs ug rehabilitation sa mga drug dependents.
Ang kagamhanan sa probinsiya naalarma sa nagkadaghang kaso sa gidili’ng drugas.
Si CPADAC executive director Joey Herrera nagkanayon nga kadto’ng dili mogahin og pundo alang sa anti-illegal drugs program sa ilang annual budget dili usab i-approve ang ilang request kun mangayo sila og supplemental budget gikan sa probinsiya.
Dunay mga lungsod nga wala makaimplementar og programa batok sa ilegal nga drugas kay wala sila’y budget nga gigahin alang niini. (BANAT NEWS)