CEBU, Philippines - Nagpabilin ang kasakit nga gihambin sa pamilya sa gipatay nga si Atty. Noel Archival human sa usa ka tuig na ang nakalabay samtang wala pa’y nanubag sa krimen.
Gipadayag ni Talamban barangay konsehal Nelson Archival nga makapasubo ang dagan sa kaso tungod hangtud karon wala pa igkita ang mga polis nga gilambigit sa kaso nga nalutsan na og warrant of arrest. Gani matud niya nga kun tinuod nga inosente ang mga akusado moatubang sila sa kaso. Gihulagway sa konsehal nga tinalawan ang gihimo nila ni Police Senior Supt. Romualdo Iglesia, Police Senior Insp. Joselito Bacani ug Police Officer 1 Alex Bacani, mga opisyal sa Highway Patrol Group-7.
Si Noel gibanhigan-patay niadtong Pebreo 18, 2014 sa Coro, lungsod sa Dalaguete.
Usa ka misa gipangulohan ni Msgr. Roberto “Boy” Alesna ang gipahigayun sa pamilya, kabanay ug suod nga mga higala ni Noel sa Angelicum Garden of Angels sa Canduman, siyudad sa Mandaue diin gilubong ang abogado. Gawas kang Noel, ang driver niini nga si Alejandro Jayme ug security aide nga si Candido Miñoza apil sab sa nakalas sa nahitabo’ng pagpamanhig. (BANAT NEWS)