CEBU, Philippines - Napatay sa kapolisan ang suspetsado’ng drug pusher apan naangol usab ang usa ka polis sa pinusilay atol sa buy-bust operation didto sa Sitio Balanghoy, Gun-ob, dakbayan sa Lapu-Lapu kaniadto’ng Miyerkules sa gabii.
Ang napatay mao si Junjun Sollano nga armado og 357 Magnum revolver samtang ang naangol mao si Police Officer 3 Archell Tero, sakop sa Lapu-Lapu City Police Station.
Wala magpadakop nga buhi si Sollano ug nakigpinusilay kini sa kapolisan didto sa hilit nga dapit sa Sitio Balanghoy. Naigo si Sollano sa ulo ug namatay. Nakuha sa kapolisan ang iyang armas.
Si PO3 Tero nasalbar sa kamatayon kay atol sa operation nagsul-ob kini og bullet proof mao nga wala kaayo makadulot ang bala apan milabhag ang iyang lawas nga naigo.
Lima ka laing gikatahapang drug pushers nadakpan sa mga sakop ni Senior Inspector Wilbert Parilla ug nasakmitan sila og daghang pakete sa shabu.
Ang mga nadakpan mao sila si Randy Hilot, 30, Roel Rizon, 31, Jhunell Cabanes, 34, Antero Cañete, 38, ug Alexander Cantillep, 45, mga nagpuyo sa lainlaing barangay sa dakbayan sa Lapu-Lapu.
Si Parilla, hepe sa Police Station sa Barangay Gun-ob, miingon nga si Randy Hilot mao g’yud ang ilang target sa operation kay nakadawat sila og report sa ilegal niini nga kalihukan.
Si Hilot nakuhaan og 32 ka pakete sa shabu samtang 13 usab ka pakete ang nakuha gikan ni Rizon. Nasakmit gikan ni Rizon ang P200 nga marked money ug usa ka 9 mm caliber pistol nga may lima ka bala.
Si Cabanes, taga Purok Balanghoy nakuhaan usab og unom ka pakete’ng shabu samtang laing unom ka pakete nga shabu nasakmit usab gikan ni Cañete.
Matud ni Parilla nga si Cantillep nga maoy katapusan nga nadakpan nakuhaan og 11 ka pakete sa shabu ug mga drug paraphernalia. (BANAT NEWS)