CEBU, Philippines - Gipahinumduman sa Simbahan ang mga Katoliko sa paghinulsol ug pagpuasa niini’ng pagsugod sa kwaresma.
Si Auxiliary Bishop Emeritus Antonio Rañola sa iyang wali sa Cebu Metropolitan Cathedral atol sa Ash Wednesday kagahapon iyang giawhag ang mga nanimba sa paghinumdum sa mga sala.
Matud niya nga panahon usab karon nga mobalik sa sabakan sa Ginoo.
Human sa wali, gisunod dayun ang pagbadlis sa agtang sa mga manimbahay gamit ang abo.
Kadaghanan sa mga nanimba nitug-an nga nangita gyud sila og paagi ug panahon nga makasimba aron lang makasalmot sa unang kalihukan sa Lenten Season nga nagpasabot og sakripisyo alang kanila.
Panghinaut sa kadagkuan sa Simbahang Katoliko nga dili kutob sa pagtambong sa mga seremonyas sa pagbalaan sa kwaresma kun dili lakip nga hinumduman ang mga kasakit nga naagian sa Labaw'ng Makagagahum aron lang pagluwas sa katawhan gikan sa kasal-anan ug pagpuyo nga nagtamod sa mga pagtulun-an sa Diyos. (BANAT NEWS)