MANILA, Philippines - Mokabat sa kapin 50 ka mga balay ang naugdaw ug napulo ang partially damage human miigo ang usa ka daku nga sunog didto sa Sitio Kawayan, Poblacion Pardo ning dakbayan sa Sugbo kagahapon sa alas 4:22 sa hapon.
Matud pa ni Cebu City Fire marshal Rogelio Bongabong nga naglisod sila sa pagresponde sa maong sunog gumikan sa kalisod sa dalan paingon sa lugar.
Sumala pa ni Bongabong nga sa ilang inisyal nga imbestigasyon naggikan ang sunog sa balay nga gipanag-iya ni Junard Pugoy apan kini giabangan ni Jefrey Malacura, apan ilaha pa kining susihon og maayo. Dali kaayo nga mikatap sa silingan nga mga balay ang kalayo tungod kay kasagaran sa mga panimalay hinimo sa light materials.
Miabot pa sa 14 ka mga hoses ang gisumpaysumpay sa mga bombero aron makaabot sa fire scene tungod kay dili g’yud masudlan ang lugar sa mga fire trucks gumikan sa kagamay sa dalan.
Electrical misuse ang usa sa gisubay karon sa kabomberohan nga posibleng hinungdan sa sunog human gikatahong naggikan sa kisame sa balay ni Malacura ang kalayo, apan nagpadayon pa ang ilang gihimo nga imbestigasyon.
Sa pakighinabi sa Banat News sa staff sa Gender and Development Program sa barangay Pardo nga si Mae Abellana kini mikompirmar nga lakip sa nasunog ang balay sa ilang barangay treasurer nga si Christopher Idul.
Ang kapitan sa maong barangay nga si Althea Lim miingon anha ipahiluna sa covered court sa barangay ang mga nasunogan, mohatag usab ang barangay og pasiunang tabang sama sa pagkaon,tubig ug kahigdaan sa mga biktima.
Ang kabomberohan ug ang mga opisyal sa dakbayan sa Sugbo gusto unta nga mag re-blocking sa maong lugar apan si kapitan Lim miingon usa ka pribadong luna ang nasunogan. Matud pa gipanag-iya sa pamilyang Aznar ang maong lugar.
Sa kinatibuk-an gibanabana sa kabomberohan nga nagbilin og kapin P300,000 nga danyos ang maong sunog. Alas 5:03 nakontrolar ang maong sunog nga giisa sa 3rd alarm. (BANAT NEWS)