CEBU, Philippines – Kompiskahon sa mga sakop sa Criminal Investigation and Detection Group-7 ang mga mikatap karon nga baligya nga mga DVD videos sa engkwentro tali sa mga sakop sa Special Action Force (SAF) batok sa mga sakop sa Bangsamoro Islamic Freedom Fighters (BIFF), Moro Islamic Liberation Front (MILF) ug mga private armed groups sa barangay Tukanalipao, Mamasapano, Maguindanao.
Ang hepe sa CIDG-7 nga si Senior Superintendent Ritchie Posadas miingon nga miduol kanila ang mga operatiba sa Anti Cyber Crime Group Central Visayas ug nagpatabang sa maong trabaho.
Sumala pa ni Posadas nga naa sila’y nadawat nga impormasyon nga duna’y pipila ka mga DVD vendors nga nagbaligya sa maong mga videos.
Gipasabot ni Posadas nga kutob lang hinuon sila sa pagkompiskar sa mga DVDs kung ilang makita apan ila pa nga ikonsulta sa taga ACCG Central Visayas kung pwedeng pasakaan og kaso ang nagbaligya niini.
Lakip sa tahas sa CIDG-7 ang pagtabang sa ACCG Central Visayas aron matultolan ug mahibaw-an kung kinsa ang nag-upload sa maong mga video ug asa kini gikan.
Si Posadas nanawagan sa publiko nga dili na lang mopalit sa maong mga DVD isip pagrespeto sa mga napatay nga 44 ka PNP-SAF ug aron way matintal nga DVD vendors pagbaligya niini. – /EIM) (BANAT NEWS)