CEBU, Philippines – Nagnegatibo sa Coliform bacteria ang tubig gikan sa Mitsumi sa Sabang, sa siyudad sa Danao, apan ang tubig nga gikan sa Sabang Waterworks nagpositibo kini sa maong kagaw human sa gihimong water sampling.
Ang Department of Health-7 nagduda karon nga kini maoy hinungdan sa pagsuka-kalibang sa dul-an 200 ka mga trabahante sa Mitsumi sa miaging semana.
Gawas nga nagpositibo sa Coliform ang waterworks nakita usab atol sa gihimong inspection sa Regional Epidemiology and Surveillance Unit (RESU-7) nga ubos ra ang chlorine residue sa maong tubig hinungdan nga dili mamatay ang kagaw.
Gitug-an ni Renan Cimafranca sa RESU-7 nga dunay mga atabay ang kabalayan apan giingong parat kini mao nga dili imnon ug gamiton lang panghugas ug gihimong ice nga ibutang sa mga ilimnong ibaligya atubangan sa Mitsumi. Duna say kasilyas duol sa atabay ug gisusi na kun mao ba kini ang hinungdan sa kontaminasyon sa tubig.
Tungod sa ilang nasayran, gikan sa usa’g tunga ka kilo nga chlorine sa matag 170 ka litrong tubig gimando sa DOH nga papun-an kini ug himuon nga tulo’g tunga ka kilong chlorine ang ibubo aron masigurong mamatay ang tanang kagaw sa tinubdan sa ilang tubig.
Wala una usab pabaligyaa ang mga manindahay og ilimnon, sama sa gulaman gawas sa Mitsumi ug gipakuha og medical ug health certificates, ug sanitary permits ang naninda sa gawas. Sa ulahing talaan, laing duha ang gikalibanga kagahapon. Sa kinatibuk-an, ang DOH nakatala na og 251 ka pasyente ug silang tanan empleyado sa Mitsumi.
Hinuon napulo na lang kanila ang anaa pa karon sa tambalanan, duha ang nagpakitang adunay sintomas sa cholera ug laing lima pa ka lab result aron pagtino kun cholera ba ang nitakboy kanila. – /EIM) (BANAT NEWS)