CEBU, Philippines – Usa ka 10- anyos nga bata ang gisuspenso sa iyang tunghaan gumikan sa pagporma niini sa iyang mga tudlo aron kun tan-awon mura’g usa kini ka pusil.
Si Nathan Entingh nagduwa-duwa sa iyang mga higala atol sa ilang klase sa science sa dihang kalit kining nagpakaaron-ingnon nga duna siya’y armas.
Si Paul Entingh, amahan sa bata mipadayag ngadto sa CNN nga si Nathan miporma sa iyang mga tudlo nga mura’g usa kini ka pusil apan iyang gipasabot nga dili kini makalisang ug normal lang kini nga kalingawan sa usa ka bata sa maong edad.
Ang insidente nakit-an sa ilang magtutudlo ug pagkasunod adlaw gipatawag si Paul sa principal sa Devonshire Alternative Elementary School didto sa Columbus, Ohio.
Atol sa maong panagtigum, ang amahan ug anak gipahibawo nga si Nathan suspendido og tulo ka adlaw nga nakapaulbo og maayo sa kaspa sa amahan. (BANAT NEWS)