CEBU, Philippines – Ang kapulisan sa Minglanilla Police nagtinguha nga ipasusi ang cellphone sa pulis nga gipatay niadtong Biyernes sa gabii nga si Senior Police Officer 4 Rasul Segismar sa pagtuo nga makatabang kini sa ilang imbestigasyon.
Si Segismar nadestino sa Boljoon Police apan residente kini sa Poblacion Ward-2 sa nahisgutang lungsod gipusil sa wala pa gihapon mailhing mga kriminal samtang sakay kini sa iyang motorsiklo paingon unta mopauli sa ilang panimalay niadtong kaadlawon sa Valentine’s Day. Si Senior Superintendent Noel Gillamac ang hepe sa Cebu Provincial Police Office nga nahinabi sa mga tigbalita gustong palawman ang imbestigasyon. “Imagine ha, a police officer being killed in cold blood there is deeper reason,” matud pa ni Gillamac. Gimandoan na ni Gillamac ang Provincial Investigation and Detective Management Branch ug Provincial Intelligence Branch sa pagpangita sa mga killers.
“We want to identify the perpetrators and at the same time the real motive of the killing,” dugang pa ni Gillamac.
Matud sa hepe sa Minglanilla Police, Chief Inspector Richard Gadingan duha ka anggulo ang ilang gisubay, ang trabaho ug personal nga bikil sa biktima ang hinungdan sa pagpatay kaniya. – /EIM) (BANAT NEWS)