CEBU, Philippines – Patay na nga nakit-an sa mga tawo ang 9-anyos nga bata’ng lalaki human nalumos sa suba samtang naligo sa sitio Combado, barangay Cantu-od, lungsod sa Balamban niadto’ng nakalabay nga udto.
Ang nalumos naila nga si Jovani Bacus nga taga sitio Bangbang, barangay Nangka sa maong lungsod.
Matud ni SPO2 Jose Ranielito Villarino, chief investigator sa Balamban Police, nga kauban sa bata ang lain pa’ng walo ka bata nga nangaligo sa maong suba.
Sumala pa nga kini ang sagad buhaton sa mga bata ilabi na kung ting-init ug wala’y klase.
Si Villarino niingon nga dunay lawom nga bahin sa maong suba nga delikado kaayo alang sa mga bata ug maoy gidudahan nga didto nalumos ang bata.
Gitug-an sa iyang mga kauban nga kalit lang nawala si Bacus.
Pasado alas 5 sa hapon nakaplagan ang patay nga lawas sa bata sa ilawom sa suba human gipangita sa mga silingan ug mga rescuers. – /GMR) (BANAT NEWS)