CEBU, Philippines – Masugdan na g’yud ang pagpaguba sa nahibilin nga estraktura sa nasunog nga kanhi merkado publiko sa Mandaue nga nahimutang sa luyo’ng bahin sa National Shrine of Saint Joseph sa Barangay Centro, Dakbayan sa Mandaue.
Kini tungod kay ang kapolisan nga sakop sa Police Station 1 sa Mandaue City Police Office (MCPO) mobalhin na sa temporaryo nila nga opisina ngadto sa Senior Citizens Building sa Sitio Tribunal, Barangay Centro.
Matud ni PO2 David Omambac nga anam-anam na sila nga namalhin sa bag-o nila nga puwesto aron makasugod na ang pagpangguba sa nahabilin nga estraktura nga anaa ang ilang opisina.
Pagka karon nagpadayon pa hinuon ang pagtrabaho sa temporaryo nga opisina sa kapolisan ingon man ang detention cell nga butangan sa mga tawo nga ilang madakpan.
Si Mandaue City Market Administrator Mosuline Suliva miingon nga paspasan nila pagpangguba ang nahabilin nga estraktura aron makasugod na ang pagtukod sa bag-ong merkado publiko sa dakbayan.
Malaumon si Suliva nga kasugdan ang pagtukod sa bag-ong merkado kun mahawan na ang mao nga dapit.
Si Mayor Jonas Cortes mihukom nga anha gihapon tukora ang bag-ong merkado luyo sa simbahan human mahugno ang merkado publiko nga gitukod luyo sa Mandaue City Sports and Cultural Complex tungod sa 7.2 magnitude nga linog kaniadtong tuig Oktobre 15, 2013. – /RUB) (BANAT NEWS)