CEBU, Philippines - Mokabat sa P200 mil ang gibanabana’ng danyos sa nasunog nga barko nga gibaradero sa Santiago Shipyard sa barangay Tayud, lungsod sa Consolacion alas 9:32 kagahapon sa buntag.
Si Senior Fire Officer 1 Edwin Quicoy, imbestigador sa Bureau of Fire Protection (BFP) sa maong lungsod, niingon nga ang nasunog mao ang M\V Kinswell 2 sa Kinswell Shipping Lines nga nagbiyahe sa Tubigon, Bohol.
Matud ni Quicoy nga dunay pagpang-welding nga gihimo sa pipila ka bahin sa barko ug gituohan nga ang nagkayo nga mga tipaka gikan sa welding ang gidakop sa kayo ug nisilaob. Dali hinuon natubag ang alarma ug nakontrolar sulod sa 30 minutos hinungdan nga wala hingpit naugdaw.
Ang upper ug lower deck lang sa barko ang nakasinati og kadaut.
Si Quicoy niingon nga sa pag-ulbo sa kayo wala’y tawo nga naangol. (BANAT NEWS)