CEBU, Philippines - Nadunggaban sa iyang silingan ang usa ka lalaki gumikan sa selos sa sitio Cantila, barangay Casili, lungsod sa Consolacion alas 8 pasado ang takna sa niaging gabii.
Ang biktima mao si Jun Ty Maquilan, hingkod ug ang suspek mao si John Ongcoy Aranas, 35-anyos, pulos nagpuyo sa maong dapit.
Si Senior Police Officer 1 Francisco Perez Jr. sa Consolacion Police Station niingon nga nag-inom ang managsilingan sa usa ka tindahan sa maong lugar ug niabot ang asawa sa suspek ug nakighinabi sa biktima.
Matud ni Perez nga daw nasuko ang suspek nga nagtan-aw sa iyang asawa nga nakigsulti sa biktima ug maoy sinugdanan sa panaglalis.
Taliwala sa mainiton nga panaglalis, ang suspek nga wala nakapugong sa kapungot ang nikuha og kutsilyo dayun dunggab sa biktima.
Nakalihay ang biktima ug gisagang ang sunodsunod nga dunggab hinungdan sa mga samad sa bukton.
Nadakpan sa kapolisan ang suspek hinungdan sa pagkabalhug sa ilang detention cell. (BANAT NEWS)