CEBU, Philippines - Nadakpan sa kapolisan ang suspek sa pagpangawat og motorsiklo sa iyang silingan sa sitio Tabay, barangay Tayud, lungsod sa Liloan samtang gipangita pa ang kauban.
Si Senior Police Officer 1 Bryan Batiquin sa Liloan Police Station niila sa nadakpan nga si Christopher Cuyos Pepito alyas Toper, 26- anyos ug ang gipangita nga kauban mao si Romil Pilapil, pulos nagpuyo sa maong dapit. Ang biktima nga si Nelson Enrico Realda, nitug-an sa kapolisan nga ang Honda Wave125 sa biktima iyang gi-parking sa tugkaran sa iyang panimalay.
Pagmata pagkabuntag maoy iya’ng nadiskubrehan nga nahanaw na ang iyang motorsiklo sa giparkingan. Dali nga nitaho sa kapolisan ang biktima ug sa pagsusi nga ilang gihimo maoy gitug-an sa pipila ka silingan nga nakakita nga gikuha kini sa suspek.
Diha’ng gisusi ang suspek, maoy ila’ng nakuha nga gihuptan nga Official Receipt ug Certificate of Registration sa motorsiklo sa biktima sa bulsa niini. Gitug-an sa suspek nga ang motorsiklo sa biktima ilang gibaligya sa ilang kaila sa sitio Dita, barangay Talamban, dakbayan sa Sugbo. (Romeo T. Limpangog/GMR)(BANAT NEWS)