CEBU, Philippines - Patay ang drayber sa motorsiklo ug naangol ‘sab ang iyang backrider human sila nabangga sa punoan sa lubi sa kurbadahong bahin sa Sitio Camandang, Barangay Teguis lungsod sa Poro. Ang drayber sa motorsiklo nga namatay naila nga si Lesondra Charlim Jr., 28, taga Basak, dakbayan sa Lapu-Lapu, samtang ang naangol mao si Eleazar Rodriquez.
Sa imbestigasyon sa Poro Police nga gipangunahan ni Senior Police Officer 4 Rene Donaire , gikan nag-inom ang duha sa lungsod sa Poro ug mopadung unta sa lungsod sa San Francisco sakay og motorsiklo.
Apan pag-abot sa nahitaboan wala nabantayan ni Charlim ang kurbadahong dalan ug midiretso sila sa punoan sa lubi. Gumikan sa kusog sa pagbangga nakaangkon og mga bun-og sa lawas ug ulo ang mga biktima, patay na si Charlim pag-abot sa San Francisco District Hospital.
Subling mipahinumdom ang kapulisan nga likayan ang pagmaneho kun nakainom. (BANAT NEWS)