CEBU, Philippines - Mikabat sa 14 ka barangay sa upat ka lungsod ug siyudad sa probinsiya sa Sugbo ang makabenepisyo sa mga day care centers nga tukoron sa Ramon Aboitiz Foundation Inc. (RAFI)-Dolores Aboitiz Children’s Fund (DACF).
Si Maria Iris Andrino, executive director sa DACF mibutyag nga ang upat ka lungsod ug siyudad gilangkuban sa Asturias, Argao, Aloguinsan ug dakbayan sa Talisay.
Sa lungsod sa Argao ang barangay Usmad, Talaga, Tulang ug Bulasa maoy mga beneficiary sa maong proyekto sa RAFI-DACF.
Sa Asturias ang barangay Tag-amakan, Owak, Lunas, Manggiyaw ug San Isidro ang mga beneficiary. Sa Aloguinsan ang beneficiary gilangkuban kini sa Barangay Zaragosa, Punay, Saksak ug Tampaan. Samtang sa dakbayan sa Talisay ang Barangay Cansojong mao ang nakabenepisyo sa proyekto. Kagahapon sa buntag gipahigayon ang pagpirma sa Memorandum of Agreement (MOA) tali sa RAFI-DACF ug sa mga benepisyaryo.
Matud ni Andrino nga ang RAFI nagtukod og mga day care center sukad pa niadtong tuig 2011 ug gibana-banang mga 60 ka day care centers ang ilang nahatag.
Samtang ang Renoir, usa ka consultancy firm sa United Kingdom midonar og pundo sa RAFI alang sa katukuran sa mga playgrounds sa day care centers. Ang RAFI maoy mo-provide sa desinyo sa building, technical documents ug sila usab ang moabaga sa materyales samtang ang LGU moabaga sa P250,000 nga suhol sa construction labor.
Apan kadtong mga LGU nga maglisud gyud sa labor o sa ilang counterpart tabangan usab kini sa RAFI. (BANAT NEWS)