CEBU, Philippines - Mokabat sa dul-an P200 mil nga shabu ang nasakmit sa kapulisan sa dakbayan sa Sugbo atol sa duha ka managlahing operasyon nga gilusad sa City Intelligence Branch ug City Anti-Illegal Drugs Special Operations Task Group.
Unang nasikop sa CIB diha sa Cavan Street, Barangay Pasil si Hipolito Gaviola, alyas Tawang nga gihulagway nga usa ka level 3 drug pusher.
Armado ang CIB og search warrant nga gi-isyu ni RTC Judge Wilfredo Navarro sa Branch 19 tungod sa paghupot og drugas dihang gironda sa grupo ni Inspector Gomersendo Mandaue.
Nakuha sulod sa balay ni Gaviola ang usa ka kahoy nga box nga duna’y sulod nga 237 ka gagmay nga pakete sa drugas nga mokantidad sa halos P100,000.
Nadakpan usab sila si Fritz Pamisa, 27, Emmanuel Alit, 24, John Ray Catipay, 29 ug Ranan Mambatac Lao, 25, nga nagduwa sa tulo ka video karera.
Samtang ang mga sakop sa CAIDSOFT misikop ‘sab ni Edgar Cuizon ,43, diha sa Sun Valley, Barangay Calamba nianang pagkagabii.
Si Cuizon kinsa napriso kaniadto sa Muntinlupa tungod gihapon sa drugas gipasanginlang usa ka level 2 drug pusher gidakop sa grupo nila ni Senior Inspector Eunil Avergonzado.
Matud pa nga napalitan kini og usa ka gamay nga paketeng shabu nga nagkantidad P200 hinungdan nga kini gidakop, apan nakaikyas ang iyang kauban.
Nakuha sa kapulisan ang usa ka medium size paketeng shabu, 45 ka gagmay nga pakete nga mikantidad og P80,000. (BANAT NEWS)