CEBU, Philippines - Daghang netizens ang wala makauyon ug misaway sa pamahayag ni Mayor Nelson Garcia sa lungsod sa Dumanjug nga maayong ipapatay ang mga whale sharks o butanding tungod kay “parasite” kini ug kompetensiya sa mga mananagat.
Gipasabot ni Garcia nga toneladang isda ang kan-on sa whale sharks kada adlaw mao nga wala nay makuha ang mga mananagat. Gawas sa whale shark nga apil sa gustong ipakuha ni Garcia ang mga dolphins.
Ang butanding protektado sa balaod tungod kay endangered species na kini ug nakatabang usab kini sa turismo.
Si Garcia mikwestiyon kun nganong ang Tañon Strait lang ang gideklara nga “protected area” nga lapad man ang dagat.
Si Garcia misugyot nga unta dunay balaod nga magtugot sa commercial fishing nga makapanagat ubos sa gitugot nga buwan nga sila makapanagat dili kay i-totally ban ang commercial fishing.
Apan matud ni Garcia nga ang turismo wala g’yud magsalig lang sa butanding tungod kay dunay mga nindot nga lugar nga maoy dayuhon o suroyan sa mga turista.
Dunay usa ka netizen nga miingon nga wala makasabot si Garcia sa kinaiyahan. “maj0_rimbaud: you practically don't understand the cycle of our ecosystem and the roles of prey and predator relationship,” usa sa mga saway gikan sa netizen.
Buot ni Garcia nga parehason sa Japan nga diin dunay panahon nga mahimong makakuha og dolphins o balyena ang mga tawo kausa sa usa ka tuig.
Si Gob. Hilario Davide III mirespeto hinuon sa opinyon ni Garcia apan dili siya uyon sa gusto niining mahitabo tungod kay matud niya dako kini og papel sa balanse sa kinaiyahan sa dagat.
Matud sa gobernador nga dili matawag nga kompetensiya ang butanding tungod kay dili man kini magpundo sa usa lang ka lugar. (BANAT NEWS)