CEBU, Philippines - Duha ka opisyal sa barangay sa Owak sa lungsod sa Asturias kinsa misibat atol sa gipahigayong drug test niadtong Oktubre sa milabay’ng tuig ang padayong gipaubos sa imbestigasyon sa Sangguniang Bayan (SB) o konseho sa lungsod matud ni Mayor Alan Adlawan.
Si Adlawan nga nahinabi sa mga tigbalita nagkanayon nga ang SB maoy nag-handle karon sa kaso sa duha ka nahisgutang konsehal sa barangay.
Matud ni Adlawan nga misumitir sa ilang “written explanation” ang maong mga opisyal sa barangay apan wala ibutyag sa mayor ang mga rason sa duha sa ilang pagsibat atol sa drug test. Gibutyag ni Adlawan nga sa maong kinalit nga drug test duha ka job order (JO) sa munisipyo ang nagpositibo ug gipalagpot na kini gikan sa ilang trabaho.
Ang Municipal Anti-Drug Abuse Council (MADAC) sa lungsod nangayo kini og tabang sa Cebu Provincial Anti-Drug Abuse Commission (CPADAC) sa pagpahigayon og kinalit nga drug test sa mga kawani sa munisipyo ug barangay.
Miabot og 72 ka kawani sa munisipyo ug barangay ang napaubos sa drug test diin duha ang nagpositibo. (BANAT NEWS)