CEBU, Philippines – Gipahigayun kagahapon ang Interfaith Prayer for Peace sa Sugbo isip pagsimpatiya sa pamilya sa 44 ka sakop sa Special Action Force nga gipamatay sa Maguindanao.
Nagkalainlaing sektor ug relihiyoso’ng pundok lakip na sa kapolisan ug militar ang nisalmot sa kalihukan nga gipahigayon sa Plaza Independencia, dakbayan sa Sugbo.
Nangulo sa pagpadangat sa pag-ampo alang sa kalinaw sila si Mons. Ben Labajo sa habig sa mga Katoliko, Dawud Lebumfacil ug Ustadz Salim sa habig sa mga Muslim, Dominador Garcia sa Baptist Church ug ubang grupo sama sa Rizalians.
Nipalanog sa ilang mensahe sila si kanhi kongresista Pastor Alcover Jr., Richard Alfajora sa Interfaith Preacher’s Educators Advocacy for Cultural Enlightenment (iPEACE), Edgar Alcover sa New Guardians, Inc. (NGI) ug uban pa. Ang hepe sa Police Community Relations sa Cebu City Police Office, Chief Insp. Enrique Belciña, kinsa nangulo sa delegasyon sa kapolisan nagdumili paghatag og pakigpulong sa kabalaka nga masaypan sila sa pagsabot. – /EIM) (BANAT NEWS)