CEBU, Philippines – Mga residente sa lungsod sa Daanbantayan nagpahigayon og rally niadtong Biyernes diha sa munisipyo sa lungsod ug nanawagan sa pito ka konsehal nga mopalabang og resolusyon aron tugotan si Mayor Augusto Corro nga maka-loan sa bangko alang sa mga proyekto sa lungsod.
Ang lungsod usa sa 16 ka munisipyo sa amihanang bahin sa Sugbo nga naapektohan sa bagyong Yolanda nga maka-avail sa cash grant nga Support for Strategic Local Development and Investment Project (S2LDIP) gikan sa WB.
Ang Municipal Development Council (MDC) maoy miila sa mga proyekto nga kinahanglanon sa lungsod ug giduso kini ngadto sa konseho.
Ang mga proyekto magkinahanglan og P885 milyones, kun maaprubahan kini sa WB, tugbangan lang sa lungsod og 10 porsiyento. Apan tungod kay way pundo ang lungsod, gikinahanglan nila mangutang sa Land Bank of the Philippines aron maoy ibayad sa 10 porsiyento sa grant sa WB.
Apan niadtong milabay’ng buwan, gikuwestiyon sa pito ka konsehal ang lakang sa mayor nga mo-loan sa LBP alang sa tugbang nga 10 porsiyento sa lungsod.
Ang buot unta nga gamitan sa S2LDIP grant gikan sa WB mao ang proyekto sa drainage system, water treatment facilities, relocation sa town hall ug wet market, modernization sa Rural Health Unit ug pagpalit og heavy equipment.
Si Corro mibisita kang Gob. Hilario Davide III aron hangyoon nga mopatunga sa kasungian niya ug sa konseho sa lungsod may labot sa nahisgutang isyu. Si Davide sa iyang bahin, nagkanayon nga tan-awon niya kung asang dapita siya makatabang sa duha ka habig.
Nanghinaot hinuon siya nga ipatigbabaw sa mga konsehal ang kaayohan sa kinabag-an sa lungsod, ug iyang nakita nga usa kini ka dakong oportunidad ang gitanyag sa WB. – /EIM) (BANAT NEWS)