CEBU, Philippines - Duha ka menor de edad nga dunay kasong robbery sa korte ug gitanggong sa karsel sa lungsod sa Malabuyoc nakaeskapo kagahapon sa kaadlawon.
Ang duha nga pulos lalaki nagpangidaron og 17 ug 15- anyos may kasong robbery nga giatubang diha sa Regional Trial Court Branch 62 sa Oslob.
Si Senior Police Officer 2 Edward Villarte, desk officer sa Malabuyoc Police Station miingon nga alas-3 na sa kaadlawon niadtong Biyernes nabantayan nga wala na ang duha sa karsel.
Gipaabot nga imbestigahon ang nag-duty nga mga polis nianang orasa nga sila si PO2 Ronnel Allera, desk officer ug jailer, ang team leader nga si SPO3 Mario Paler, ang mga alert personnel nga sila si PO3 Joselito Perellano, PO1 Edward Sagun ug PO1 Elmer Grengia.
Sumala pa ni SPO2 Villarte nga base sa pamahayag sa iyang mga kauban nga wala kaayo mabantayi ang duha sanglit mga menor de edad pa man kini. Ang duha nakaeskapo pinaagi sa pagguba sa padlock sa prisohan.
Daling gilusad sa mga polis nga naeskapohan ang hot pursuit operation pagpangita sa duha apan hangtod karon wa pa madakpi pagbalik ang duha.
Gipahimo na og eksplinasyon ang mga polis nga on-duty niadtong higayona kalabot sa pag-ikyas sa mga bata. (BANAT NEWS)