CEBU, Philippines - Giawhag sa kapulisan sa dakbayan sa Sugbo ang publiko nga motaho sa ilang buhatan kung dunay ibaligyang barato nga motorsiklo ug walay sakto nga mga papeles.
Si Superintendent Romeo Santander, hepe sa City Intelligence Branch miingon nga makig-alayon sila sa mga barangay aron batokan kining nagkagrabeng problema sa pagpangawat og motor.
Ang Highway Patrol Group-7 namahayag nga mitaas ang kaso sa pagpangawat og motorsiklo dinhi sa Sugbo tungod kay gigamit na karon ang mga makina niini sa mga pumpboats.
Ang mga makawat nga motor giingong gi-chopchop ug gipamaligya ang ubang mga piyesa ug dapat niini, samtang gipangdala sa Bohol ang mga makina. Matud pa ni Santander nga kinahanglan lang og koordinasyon sa barangay, HPG ug sa ubang law enforcement units sama sa Regional Maritime Unit-7 aron mapakgang kini.
Hinuon apil karon sa ilang gitan-aw ang mga kargamento sa mga pumpboats nga manukad sa Pasil padung sa Bohol nga matud pa diha ikarga ang mga makina sa kinawat nga motor.
“Mahibaw-an ninyo kun moingon nga way papeles, there’s something wrong with that so please feel free to call us,” awhag pa ni Santander. Matud pa niya angay usab mag-amping ang mga tag-iya og motor pinaagi sa pag-padlock sa sprockets sa mga motorsiklo aron di makadagan. (BANAT NEWS)