CEBU, Philippines - Usa ka hubog ang gidakop sa kapolisan human kini mipabuto og shotgun tungod sa grabe’ng kasuko ug nakaangol sa tulo niya ka silingan nga naglakip sa duha ka menor de-edad. Didto kini mahitabo sa Sitio San Jose, Barangay Maravilla, lungsod sa Tabuelan kaniadto’ng Domingo sa hapon. Ang suspek nga si Ronilo Baflor, 34, ulitawo ug wala'y trabaho, nag-inom kini uban ang iyang bayaw ug amahan sa wala pa ang hitabo.
Matud ni PO3 Gilbert Allego, imbestigador sa Tabuelan Police Station, nga gibadlong na sa igsuong babaye ni Baflor ang tulo nga mohunong na og inom kay hubog na sila ug saba na kaayo sa videokehan.
Apan misangpot na hinuon sa panaglalis sa igsuong babaye ni Baflor ug sa iyang bana. Si Baflor milaban sa iyang igsuong babaye ug nagsukmagay sila ug ang iyang bayaw.
Tungod kay napilde si Baflor, mikuha kini og shotgun. Sa kahadlok sa mga silingan, dali sila’ng midagan sulod sa ilang tagsa-tagsa ka panimalay.
Pagkakita ni Baflor nga wala na ang iyang bayaw sa gawas, iyang gipabuto ang shotgun tumong sa balay ni Elma ug Celso Zamora.
Matud ni PO3 Allego nga didto naigo ang duha ka anak sa magtiayon nga sila si Jaymart Zamora, 18, ug Kianjay Zamora, 6, ug ang pag-umangkon sa magtiayon nga si Roselyn Baring, 15. Ang biktima’ng si Jaymart nakaangkon og samad sa wala nga bitiis samtang si Kianjay naigo sa tiyan ug si Roselyn nakaangkon og samad sa ibabaw nga bahin sa wala nga tuhod. (BANAT NEWS)