CEBU, Philippines - Gipaningkamutan karon sa National Food Authority (NFA) nga mahimo pa sila’ng mas epektibo sa pag-monitor sa ilang bugas nga giladlad sa kamerkaduhan sa mga accredited nga rice retailers.
Si Lucy Rosales, public information officer sa NFA-7, niingon nga natigayun ang pagpinirmahay sa kasabutan sa niagi’ng adlaw uban sa usa ka grupo nga moabag sa ilang monitoring sa pagseguro nga mahimo’ng dali nga mapalit sa mga kabus nga konsumedor ang bugas.
Ang “Kaya Natin” nga grupo boluntaryo nga moabag sa monitoring sa pagpamaligya sa bugas sa NFA. Gihimo ang higpit nga monitoring sa gibaligya nga bugas sa NFA tungod sa katahap nga ang pipila ka mga negosyante misagol sa bugas sa NFA ngadto sa commercial rice aron mahal ang presyo.
Ang ordinaryo’ng bugas sa NFA mapalit lang sa tag P27 matag kilo ug ang NFA rice nga susama sa premium rice ang klase gibaligya lang sa tag P32 ang matag kilo. (BANAT NEWS)