CEBU, Philippines - Ang National Commission on Muslim Filipinos (NCMF) sa Kabisay-an nagtuo nga ang Bangsamoro Basic Law ang usa sa makatabang sa kagubot sa Mindanao. Matud ni Alexander Minalang, officer-in-charge sa NCMF, nga dili solusyon ang sugyot nga all out war ug air strike tungod kay mas luoy ug apektado ang mga sibilyan.
Nanawagan usab si Minalang nga huwaton ang resulta sa gihimo’ng special investigation sa nahitabo sa mga sakop sa Special Action Force.
Ang NCMF nisimpatiya sa mga nabiyaang pamilya sa mga sakop sa SAF ug ilang girespetaran ang nagkalain-laing opinyon sa katawhan.
Ang nationwide address ni Presidente Aquino sa niaging adlaw nakaangkon og daghang pagsaway tungod kay gihulagway sa publiko nga wala’y direkta’ng gitubag sa Presidente ang mga pangutana kun nasayud ug may pagtugot ba gikan kaniya ang operasyon nga niresuta sa engkwentro tali sa mga rebelde’ng Moro Islamic Liberation Front.
Human sa maong hitabo, sila si Senador Ferdinand Marcos Jr., JV Ejercito, Tito Sotto ug Allan Peter Cayetano ni-withdraw sa ilang suporta sa BBL.
Gipasalig usab sa NCMF nga ang nahitabo sa Maguindanao dili mahitabo dinhi sa Kabisay-an. (BANAT NEWS)