CEBU, Philippines - Gidakop sa Provincial Intelligence Branch ug Provincial Investigation and Detection Management Branch ang unom ka tawo nga gituohang sakop sa usa ka sindikato nga nalambigit sa “large scale estafa” ug “falsification” atol sa usa ka entrapment operation sa dakbayan sa Danao niadtong adlaw nga Miyerkules.
Sila si Heracleo Alterado ug Nilda Tacandong nasikop pasado alas 10 sa buntag ug ang kauban nga si Lorraine King ang nakasibat.
Human gipaubos sa interogasyon sila si Alterado ug Tacandong, sila nitug-an sa mga polis nga duna pa sila’y mga kauban.
Gihimo ang follow-up operation nga misangpot sa pagkasikop ni Zenaida Alabado pasado alas 3 sa hapon sa samang adlaw sa White Gold parking area.
Pasado alas 4 sa hapon ila sab nasikop si Ronie Primaco, usa ka graphic artist, kauban ni Arlinda Mencidor ug si Richard Uy nasikop sab pasado alas 6 sa hapon sa barangay Kasambagan, Cebu City. Duha ka babaye nga sila si Nilda Tse ug Rufina Go ang nagpatabang sa kapolisan. Si Alterado ug Tacandong gidakop dihang paingon na unta magpa-encash sa usa ka “fake check” kantidad og P186,000 sa tindahan ni Tse sa Danao.
Usa sa mga suspek nga si Uy nakuhaan sab og peke nga salapi ug usa ka makina sa paghimo og peke nga kuwarta sa iyang balay sa barangay Kasambagan.
Si Uy niingon nga dili niya kaila ang uban nga nasikop sa mga awtoridad nga una’ng niingon nga sila kauban.
Ang mga nasikop hugot nga nihimakak sa pasangil ug nitudlo sa usa ka Eugene nga mao’y nagpasiugda sa tanan.
Ang kapolisan mopasaka og kaso’ng falsification of public documents ug large scale estafa nga wala’y piyansiya nga girekomendar. (BANAT NEWS)