CEBU, Philippines – Nasikop sa mga sakop sa Cebu City Police Intelligence Branch ang usa ka 38-anyos nga lalaki nga giingong notado nga drug pusher sa Barangay Day-as kaniadto’ng Lunes sa kaadlawon.
Ang dinakpan giila nga si Richard John Parame, ulitawo ug nagpuyo sa Barangay Day-as ug taud-taod na nga gipanid-an sa kapolisan, sumala pa ni Supt. Romeo Santander, ang hepe sa City Intelligence Branch.
Matud ni Santander nga una na nila’ng gi-subject of buy-bust si Parame kaniadtong Nobiyembre apan abtik kini nga nakasibat sa mga polis atol sa mao nga higayon.
Si Santander miingon nga idlas kaayo si Parame nga gihulagway nga usa ka “level 3” drug pusher. Karong bag-o lang na-monitor sa kapolisan nga si Parame mibalik sa iyang pagpamaligya og shabu diha sa Day-as.
Gamit ang P100 nga buy-bust money, ang asset sa CIB nakapalit og usa ka gamay’ng pakete sa shabu gikan ni Parame mao nga dali kini nga gidakop sa mga polis.
Matud ni Santander nga misulay na usab unta og sibat si Parame apan wala na kini nakaikyas kay gilibotan na sa kapolisan ang iyang panimalay.
Diha’ng gisiksik sa mga polis ang iyang balay human madakpi si Parame nakuhaan pa g’yud kini og tulo ka medium size nga pakete sa shabu ug 44 ka gagmay’ng pakete.
Ang mga shabu nga nakuha gikan ni Parame gibana-bana nga nagkantidad ug P150 mil ug kuwarta nga P2 mil. Si Parame mihilak ug miingon nga dili iyaha ang nakuha nga mga drugas.
Kaso nga paghupot ug pagbaligya og ilegal nga drugas ang atubangon ni Parame nga karon gitanggong na sa karsel sa Cebu City Police Office. – /RUB) (BANAT NEWS)