CEBU, Philippines – Supak ang hepe sa Police Regional Office -7 nga himuong permanente nga officer in-charge (OIC) sa Cebu City Police Office (CCPO) si Senior Superintendent Conrad Capa kay mas angayan kini nga mokupot og mas taas nga posisyon sa kapulisan.
Si Chief Superintendent Prudencio Tom Bañas miingon dili angay hikawan sa katungod si Capa nga ma-promote sa mas taas nga ranggo ug makahawid sa mas taas nga posisyon pinaagi sa pagpapundo kaniya sa CCPO.
Si Bañas namahayag niini human namahayag si Cebu City Mayor Michael Rama nga gusto niya nga himuon nang director sa CCPO si Capa tungod kay nakauyon kini sa liderato niini sa kapolisan sa siyudad.
Si Capa maoy kasamtangang deputy chief for operations sa PRO-7 gawas sa iyang pagka OIC Chief sa CCPO, human nga gibalhin og pwesto ang kanhi hepe sa CCPO nga si Sr. Supt. Noli Romana niadtong Disyembre 4 sa nakalabay nga tuig.
Si Bañas nakadayeg sa abilidad ni Capa sa preparasyon sa seguridad sa Sinulog ug sa kapaskohan dinhi sa Sugbo nga nagmalampuson ug malinawon.
Si Capa nagpasalamat sa mayor ug miingon nga mopadayon lang siya sa iyang trabaho isip OIC sa CCPO ubos sa mando sa iyang mga labaw. – /EIM) (BANAT NEWS)