CEBU, Philippines – Grabe’ng naangol ang usa ka tawo nga biktima sa pagpanigbas sa iyang ig-agaw sa sitio San Antonio, barangay Guinsay, dakbayan sa Danao alas 7 pasado sa niaging Domingo sa gabii.
Ang biktima mao si Danilo Alerta, 25-anyos, minyo ug ang nagtigbas mao si William Alerta, hingkod, silingan lang sa maong dapit.
Si Police Officer 2 Ronald Gomez sa Danao Police Station niingon nga personal ang panagbangi sa duha nga nisangko gyud sa mainiton nga panaglalis.
Dugang pa niya nga ang suspek wala na makapugong sa iyang kasuko ug dali kini’ng nikuha og sundang sa ilang balay ug giduslak ang biktima sa makadaghang higayun.
Wala pa gyud natagbaw, ang suspek nitigbas pa sa agtang ug bukton sa biktima.
Dali nga gidala ang biktima sa tambalanan ug ang suspek nadakpan kinsa temporaryo nga gitanggong sa Danao City Jail alang sa tukmang kaso nga ipasaka. – /GMR) (BANAT NEWS)