CEBU, Philippines - Natanggong sa bilanggoan ang Chinese nga hubog human gireklamo sa usa ka babaye nga gikataho’ng gitukmod sa langyaw ug nabun-og sulod sa usa ka massage parlor sa dalan Plaridel, barangay Sto. Niño, dakbayan sa Sugbo niadto’ng nakalabay nga gabii.
Ang nireklamo giila nga si Amy Jabonite, 26, taga Letmon, Dumlog, dakbayan sa Talisay samtang ang suspek giila nga si Willy Ang, 35, taga Ho-Chin City ug temporaryo nga nagpuyo sa usa ka lodging house sa mao nga barangay. Sumala pa ni SPO1 Aaron Pescadero, desk officer sa Waterfront Police, nga atol nga didto sa sulod sa massage parlor ang langyaw kalit lang nasuko ug gitukmod sa makatulo ka higayun ang biktima. Sa pagresponde sa kapolisan, dali nila nga gidala sa Cebu City Medical Center (CCMC) ang langyaw aron ipaubos sa liquor test ug kini nagpositibo. Matud ni Pescadero nga lagmit ila na lang sab buhian ang langyaw kung dili na mopasaka og kaso’ng physical injuries ang biktima. (BANAT NEWS)