CEBU, Philippines - Ang gipasanginlan kaniadto nga robbery gang leader nasikop sa mga sakop sa Provincial Intelligence Branch, Provincial Investigation and Detection Management Branch ug sa Provincial Anti-Illegal Drugs Special Operation Task Group atol sa buy- bust operation sa Barangay Malingin sa dakbayan sa Bogo.
Si Joel Sumabong, nasikop sa kapolisan lakip na iyang asawa nga si Jovy Sumabong ug tulo ka mga batan-on kansang mga pangalan gipugngan hangtud di ma-beripika ang mga edad.
Matud pa ni Senior Police Officer 1 Reynaldo Solante, ang team leader sa maong operasyon nga tulo ka semana nga gipaubos nila sa surveillance ang maong suspek una nila gihimo ang buy- bust operation.
Matud pa niya nga ilang nabantayan nga matag Sabado molibod si Sumabong sa mga lugar aron “mangolekta” ug mobalik sa iyang balay sa adlaw na nga Domingo na.
Dihang naabot na sa gikasabotang lugar sa Barangay Malingon, ang suspek sakay sa iyang multicab kuyog sa iyang asawa ug anak ug duha ka bata-bata daling gisikop sa kapolisan.
Nakuha gikan sa mga suspek ang unom ka dagkong pakete nga gituohang shabu nga nagkantidad og kapin sa P600 mil ug usa ka kalibre .45 nga pistola nga may 21 ka bala, usa ka .357 revolver nga may upat ka bala, ug usa ka kalibre .38 nga revolver, usa ka granada ug ang usa ka multicab.
Matud pa niya nga si Sumabong usa ka level two drug pusher ug ang iyang operasyon moabot sa silingang mga lugar sa Bogo. Apan matud pa niya nga si Sumabong ang gitudlong suspek sa tulis sa Land Bank of the Philippines ug sa pagrapido sa balay sa kanhi polis nga si retired SPO4 Constantino Cueva nga nasamdan sa iyang paa niadtong tuig 2013.
Matud pa ni Solante nga sa pagkasikop ni Sumabong nga gikatahong maoy lider sa Sumabong-Ancero criminal gang daghang mga krimen sa norte ang masulbad.
Samtang gidayeg ni Bogo City Mayor Celestino “Junie” Martinez Jr. ang mga sakop sa Provincial Intelligence Branch (PIB) sa malampusong pagsikop kang Sumabong ug upat ka kauban.
“Finally, I hope nga ma-lessen na gyud ang illegal drugs sa norte ug sa Bogo,” matud ni Martinez.
Giisip ni Martinez si Sumabong nga dakung supplier sa shabu dili lang sa dakbayan sa Bogo kun dili sa tibuok amihanang bahin sa probinsiya base sa iyang nakita sa mga ebidensiya.
“Supplier g’yud na siya, kung imong tan-awon ang picture sa evidence, worth P200,000 na sa pagkadakop lang na, I think nakahug nana siya sa laing lugar,” matud ni Martinez.
Saksi sa imbentaryo sa mga ebidensiya sila si Konsehal Cresencio “Cres” Verdida, Barangay Kapitan Allan Araneta sa Banban ug Marilyn Caluidkid sa Malingin. (BANAT NEWS)