CEBU, Philippines - Kritikal ang kahimtang sa usa ka drayber sa motorsiklo human nabanggaan sa usa ka kotse nga milupad sa center island ug misilaob diha sa South Road Properties (SRP) kagahapon sa buntag.
Ang drayber sa motorsiklo naila nga si Jeric Merlin, 21, taga Minglanilla ug paingon unta sa dakbayan sa Sugbo, samtang ang drayber sa Toyota Vios gimaneho ni Deaney Dampor, 21, kinsa paingon sa dakbayan sa Lapu-Lapu.
Matud pa ni City Traffic Office Management Operations Chief Joy Tumulak nga nahinabi sa Banat News, kritikal ang kahimtang sa drayber sa motorsiklo nga anaa karon nalandig sa Vicente Sotto Memorial Medical Center (VSMMC) nga nakaangkon og grabeng bun-og sa iyang ulo.
Sigun pa ni Tumulak nga miangkon si Dampor nga kusog ang iyang dagan ug pag-abot niya sa maong lugar wala niya nabantayan nga gi-scrape ang kalsada sa maong lugar hinungdan nga nawad-an siya og kontrol sa manobela.
Tungod niini napadung kini sa center island sa kalsada dayon milupad sa pikas nga dalan ug tayming ‘sab nga nagdagan ang motorsiklo nga gimaneho ni Merlin ug kini nabanggaan sa kotse.
Human sa hitabo dali nga midilaab ang kotse hangtud nga kini naugdaw samtang si Dampor nakaangkon og bun-og sa iyang bukton apan si Merlin gidala sa tambalanan.
Tungod sa aksidente nahuot ang dagan sa trapiko sa maong lugar gikan alas-8 hangtud alas-10 na sa buntag. (BANAT NEWS)