CEBU, Philippines - Mokabat tunga sa milyon ka pesos ang kantidad sa mga alahas nga nakuha sa kawatan sulod sa usa ka condo unit nga gipuy-an sa upat ka bakasyonista gikan sa Amerika sa barangay Apas, dakbayan sa Sugbo nga nitambong sa Sinulog.
Ang mga biktima naila nga sila si Vanessa Del Prado, 23, dalaga, Mary Anne Ricardo Del Prado, 59, Virgilio Del Prado, 66 ug Adeline Radaza, 59, taga Los Angeles, USA.
Gibana-bana sa kapolisan nga ang pagpangawat nahitabo alas 11 sa buntag hangtud sa alas 5 sa hapon diha’ng wala’y tawo ang condo unit.
Si Sr. Insp. Peter Hartzel Bellido, hepe sa Mabolo Police, niingon nga wala sila’y nakita nga ilhanan nga gipugos pagsulod ang maong lugar.
Hinuon si Bellido niingon nga duna sila’y nakuha nga mga finger prints sa posibleng nikuha sa mga alahas.
“Wala’y CCTV ang lugar, pero naa ta’y nakuha nga finger prints, mas maayo man gyud kung based ta sa forensic evidence para mailhan nato kung possible kinsa’y mihimo ani,” matud ni Bellido.
Card lang nga i-swipe ang silbing yawe sa pultahan ug kini sab ang gisusi sa kapolisan kung kinsa ang duna’y katakus nga makasulod gawas ug makakuha sa maong card diin wala sab nila gipadaplin ang posibilidad.
“Pag check namo wala’y force entry. Early pa kaayo nga mo-rule out ta nga inside job, pero apil na sa atong investigation,” dugang ni Bellido.
Nakuha sa kawatan ang mga mahalong alahas nga duna’y mga diamond ug mahalong gadgets nga ang tanan nikantidad og P547, 160. (BANAT NEWS)