CEBU, Philippines - Patay ang usa ka lalaki human nakaangkon og grabeng paso sa iyang ulo ug sa nagkadaiyang parte sa lawas human nasunog ang iyang payag-payag sa Sitio Laray Tambo, Barangay Kawit lungsod sa Medellin.
Ang biktima naila nga si Rosalito Tumanot, 28, nagpuyo sa maong lugar.
Matud pa ni Police Officer 3 Mario Verzosa, desk officer sa Medellin Police nga nahinabi sa Banat News, alas- 4 sa kaadlawon sa dihang nakamata ang inahan sa biktima nga si Rosario sa kalit nga pag-ulbo sa sunog.
Apan giingong dugay nga nakabangon si Rosalito hangtud nga gilamoy na ang tibuok balay sa kalayo una pa kini nakagawas.
Si Rosalito napaso sa kalawasan ilabina sa ulo ug daling gitabang ug gidala sa Vicente Sotto Memorial Medical Center (VSMMC) apan nakabsan g’yud kini sa iyang kinabuhi.
Ang Banat News misulay pa og kontak sa kabomberohan sa maong lungsod aron pagsubay sa hinungdan sa sunog apan dili makontak ang linya sa ilang buhatan. (BANAT NEWS)