CEBU, Philippines – Hapsay ang usa ka gabii nga pagbilar sa imahen sa Senior Santo Niño sa Saint Joseph National Shrine sa dakbayan sa Mandaue niadtong Biyernes hangtud sa Sabado sa buntag.
Giangkon sa Mandaue City Police Office (MCPO) nga malampuson ang ilang paghatag og seguridad sa liboan ka mga deboto nga nagtapok sa tibuok gabii sa simbahan.
Si Police Officer 2 David Omambac sa Police Station 1 sa MCPO miingon nga sukad sa paghidangat sa imahen sa balaang bata niadtong Biyernes sa buntag wala sila’y natala nga mga biktima sa pagpangawat, pangpanguot, pagpanglabni ug uban pa. Ang hepe sa Presinto 1 sa MCPO, Senior Inspector Jimmy Portes, ang gitahasan sa pagpangulo sa paghatag og seguridad sa mga deboto nga nagbilar ug nagtapok sa sulod ug gawas sa simbahan.
Ang direktor sa MCPO, Senior Superintendent Patronelli Baldebrin, una na nga nagpahibawo sa higpit nga pagdili pagpalupad og helium balloons sa atol sa foot procession ug ingon man sa pagduslit og pabuto. Apan namatikdan nga dunay pipila nga wala gihapon mapugngi dihang nilabay ang karo nga giluwanan sa imahen ni Senior Santo Niño. (BANAT NEWS)